Projet Gordes — Correspondance du XVIe siècle

Monsieur, i’ai receu la lettre quil vous a pleu m’escrire

du premier de ce mois et tant par icelle que la votre

du VIII presant à monsieur d’Apt, suis esté adverti

de la continuation de votre bonne santé don i’en loue

Dieu et le prie bien humblement nous fère

souvant entendre si bonnes et desirées nouvelles. Bien

suis-ie mari de tant de peine et travailh

que ses miserables troubles vous amenent

et semble que en Daulfiné ranforcent tousiours.

Ici lon a publié la suspension darmes

iusques au XVe du mois qui vient. Je

prie à Dieu nous envoier une bonne et

asseurée payx. Sil ne vient de lui, les

hommes ne feront rien qui valhe, car il

semble que une bonne partie se reiouise des

guerres civilles. Lon a recogneu ses jours

passés Menerbe, et dict lon que

[barré : lon]

là sassiegera

bien tost. Ceulx de dedans se ranforsent et

delibèrent de se bien defandre. A Gordes,

lon faict tousiours bonnes gardes et vivent

en bonne payx et concorde iusques à presant.

Ceulx du Contat courent et pilhent tousiours, qui est

cause que le labourage sesse ung peu.

[45B]

Monseigneur d’Apt et tous vos anfans graces à Dieu sont en très

bonne senté, comme aussi est monsieur de St Sernin et tous se

recommandent bien humblement à vos bonnes graces comme aussi fais

ie bien humblement, priant Dieu vous donner,

monsieur très heureuse et longue vi. De

[barré : Gordes]

Apt se

XVI mars 1574

Votre à jamais très humble et plus affesionné

frère et serviteur

de Simiene

Consultation